Pyerluici Kollina AFFA-ya təşəkkür məktubu göndərdi

4 noyabr 2026, Bakı — FIFA Hakimlər Komitəsinin sədri Pyerluici Kollina Azərbaycanda keçirilmiş U-15 dünya çempionatı və festivalında hakimliyin təşkilinə görə AFFA-nın baş katibi Cahangir Fərəcullayevə rəsmi təşəkkür məktubu göndərib. Bu barədə Offsideplus.az məlumat yayıb.

Məktubda tədbirin oyunlarının peşəkar səviyyədə idarə olunması və hakimliyin yüksək standartlara uyğun təşkil olunması xüsusi vurğulanıb. Kollina yazıb: "Belə mühüm tədbirin uğurla həyata keçirilməsi yalnız peşəkar hazırlıq, yüksək təşkilatçılıq bacarığı və fədakar komanda işi sayəsində mümkün olub. Bu baxımdan AFFA-nın Hakimlər Komitəsi və Hakimlər Departamentinin göstərdiyi səyləri xüsusi qeyd etmək istəyirik".

Kollina məktubunda həmçinin turnirdə fəaliyyət göstərən bütün AFFA əməkdaşlarına və azərbaycanlı hakim heyətinə təşəkkürünü ifadə edib. Bildirilib ki, yarışın matçlarını ümumilikdə 86 hakim idarə edib; onlardan 80-i azərbaycanlı, 6-sı isə Türkiyə və Gürcüstandan dəvət olunmuş mütəxəssislər olub.

Məktub AFFA-nın təşkilatçılıq və hakimçilik sahəsindəki işi barədə beynəlxalq səviyyədə verilən müsbət qiymətin rəsmi təsdiqi kimi qiymətləndirilir.

Mənbə: Offsideplus.az

Hazırladı: GettoSport