Qolden Steyt Porziqisin müqaviləsini saxlamaq qərarına gəldi

Qolden Steyt Uorriors rəhbərliyi Kristaps Porziqisin klubdakı gələcəyi ilə bağlı qəti qərarını verib. Komanda daxilindəki qeyri-müəyyənliyə baxmayaraq, klub oyunçu ilə mövcud müqaviləni ləğv etmək niyyətində deyil. Bu barədə Offsideplus.az məlumat yayıb.

Latviyalı basketbolçu məşq toplanışının başlamasına bir gün qalmış səhhətində yaranan problemlərlə əlaqədar rəhbərliyə məlumat verib və hazırda kollektivə qoşulmayıb. Oyunçunun uzun müddət komandadan kənarda qalması klub daxilində narazılığa səbəb olsa da, rəsmilər basketbolçunun vəziyyəti ilə bağlı əlavə açıqlama verməkdən çəkinirlər.

Qeyd edək ki, daha əvvəl ESPN-in insayderi Şəms Çaraniya Porziqisin öz karyerası barədə ciddi qərarlar vermək ərəfəsində olduğunu bildirmişdi.

Mənbə: Offsideplus.az

Hazırladı: GettoSport