Sabah Qarabağla oyunda heç-heçəni ədalətli saydı

25 oktyabr 2026 — Misli Premyer Liqasının doqquzuncu turunda "Sabah" və "Qarabağ" arasında keçirilən qarşılaşma 0:0 hesabı ilə yekunlaşıb. Oyundan sonra "Sabah"ın baş məşqçisi Valdas Dambrauskas mətbuat konfransında nəticəni ədalətli saydığını bildirib.

Dambrauskas hər iki komandanın müdafiədə möhkəm oynadığını, ilk yarıda isə daha çox hücum edən tərəfin onların olduğunu qeyd edib: “Bu gün çox keyfiyyətli rəqiblə qarşılaşdıq. Hər iki komandanın müdafiə xətti yaxşı oynadı. İlk hissədə hücumda daha fəal idik. Düşünürəm ki, heç-heçə ədalətli nəticədir. Təəssüf ki, qollar olmadı. Stadionda çox gözəl atmosfer var idi, amma azarkeşlər qol sevinci yaşaya bilmədilər.”

Litvalı mütəxəssis stadiona çatma müddətinin qısaldığını və şəraitin yaxşı olduğunu vurğulayıb: “Əvvəllər oyunlara getmək üçün avtobusda uzun müddət yol qət edirdik. Hətta bəzi futbolçuların ürəyi bulanırdı. İndi isə stadiona cəmi 15 dəqiqəyə çatırıq. Bu, bizim üçün böyük rahatlıqdır.”

Dambrauskas ehtiyatda qalan Rəhman Daşdəmirovu rotasiya səbəbi ilə izah edib və mövsüm ərzində 50-dən çox qarşılaşma keçirəcəklərini əsas gətirib: “Rəhman indiyədək komandamız üçün çox iş görüb... Buna görə heyətdə dəyişikliklər etməliyik. Gələcəkdə onu yenidən start heyətində görə bilərsiniz.”

Baş məşqçi həmçinin futbolçularına Avropanın böyük klublarından təklif gəlməsinin onu sevindirəcəyini söyləyib və gedən oyunçuların yerinə yeni oyunçular gətirəcəklərini əlavə edib. Dambrauskas qarşıdakı rəqiblərlə bağlı da danışaraq “Qarabağ”la oyunu Dortmund "Borussiya"sına qarşı keçirilən matçla müqayisə etməyin düzgün olmadığını vurğulayıb və “Turan Tovuz”, daha sonra isə “Vikinq”lə oyunlarının olduğunu xatırladıb.

Mənbə: GettoSport