Tihinen Bakıda U-15 dünya çempionatını yüksək qiymətləndirdi

25 oktyabr 2026. FIFA-nın texniki araşdırma qrupunun üzvü və sabiq Finlandiya millisinin futbolçusu Hannu Tihinen Bakıda oktyabrın 24-də başlayan və 30-dək davam edəcək tarixdə ilk U-15 dünya çempionatını və festivalını yüksək qiymətləndirib.

Tihinen yarışın miqyasına diqqət çəkərək tədbiri “idman tarixinin ən böyük milli komandalar arasında keçirilən turniri” adlandırıb və 189 milli assosiasiyanın nümayəndələrini bir araya gətirməsinin əhəmiyyətini vurğulayıb. O, turnirin futbol vasitəsilə ölkələr və mədəniyyətlər arasında əlaqə yaratdığını qeyd edib: “Müxtəlif ölkələrin komandalarının bir-birinə qarşı oynadığını, daha sonra isə idmançılar kəndində ünsiyyət qurduğunu görəndə bunun nə qədər inanılmaz hadisə olduğunu anlayırsan.”

FIFA nümayəndəsi idmançılar kəndində yaradılan şəraitdən təəssüratını bölüşüb və təşkilatın yüksək səviyyəli olduğunu söyləyib: “İdmançılar kəndi və turnirin təşkili heyranedicidir. Yarışların mümkün qədər səmərəli və yüksək səviyyədə keçirilməsi üçün hər şeyi daim planlaşdırmaq və əlaqələndirmək lazımdır.”

Bakıda təxminən 1000 oyun keçirilməsi planlaşdırılır. Qarşılaşmaların əsas hissəsi Hövsan İdman Kompleksində, açılış və fərqli səviyyələr üzrə final oyunları isə Baku Crystal Hall-da təşkil olunur. Yarışlar 8-ə 8 formatında keçirilir; hər oyun 20 dəqiqəlik iki hissədən ibarətdir.

Tihinen əlavə edib ki, bu turnirin əhəmiyyəti yalnız idman nəticələrində deyil: bir çox gənc oyunçu üçün Bakı onların ilk xarici səfəri olub və fərqli mədəniyyətlərlə tanışlıq, dostluq, mahnı və rəqslər kimi təcrübələr onların inkişafı üçün əvəzsizdir.

U-15 dünya çempionatı FIFA-nın Qlobal Futbol İnkişafı Departamentinin rəhbəri Arsen Vengerin kuratorluq etdiyi İstedadların İnkişafı Proqramı (Talent Development Scheme) çərçivəsində keçirilir və məqsəd perspektivli futbolçulara bərabər imkanlar yaratmaqdır.

Mənbə: GettoSport