Turan Çempionlar Liqasının qrupuna bir addım yaxınlaşdı

Qadın voleybol komandası Turan CEV Çempionlar Liqasının III təsnifat mərhələsində qrup mərhələsinə vəsiqə qazanmağa yaxınlaşıb. Komanda noyabrın 3-də Bolqarıstanda keçirilən ilk görüşdə Maritsa ilə qarşılaşıb və bu nəticədən sonra cavab matçı 10 noyabrda Tovuzda oynanılacaq. Bu barədə Sportinfo.az məlumat yayıb.

Baş məşqçi Ziya Rəcəbov bildirib ki, Turan Bolqarıstanda keçirilən oyunda 3:0 (25:22, 25:22, 25:20) hesabı ilə qalib gəlib və bununla qrup mərhələsinə yüksəlməyə bir addım qalıb. O, görüşdən sonra Bakıya qayıtmaq əvəzinə Avropada qalmağın doğru qərar olduğunu vurğulayıb:

"Xorvatiyadakı görüşdə saat fərqi, uzun yol və iki reys dəyişməyimiz yorğunluğa səbəb olmuşdu. Noyabrın 5-də evdə oynamalı idik, lakin Bakıya qayıdıb dərhal yenidən Avropaya yollanmaq əvəzinə, elə orada qalmağı məqsədəuyğun saydıq. Rəqib də səfərdən gəldiyi üçün ilk matçın Bolqarıstanda keçirilməsi təklifini qəbul etdik. Onlar bizə məşq prosesi və digər məsələlərlə bağlı şərait yaratdılar. Avropada qalmağımız bərpa olunmağa və yaxşı hazırlaşmağa böyük kömək etdi".

Rəcəbov həmçinin heyətdəki itkilər və rəqibin xüsusiyyətlərindən danışıb: "Maritsa gənc və ucaboy voleybolçulardan formalaşmış yaxşı komandadır. Bizdə Marta Drpa Xorvatiya təmsilçisi ilə son qarşılaşmada zədələnmişdi, Vilma Salas isə viza problemi səbəbindən kollektivə qoşula bilməmişdi. Buna baxmayaraq, xarakter nümayiş etdirən voleybolçularımızı təbrik edirəm. Mladost-la matçdan dərhal sonra Bolqarıstan klubunu təhlil etmişdik və oyunçularımız tapşırıqları tam yerinə yetirdilər".

Rəcəbov gələcək planları da açıqlayıb: noyabrın 5-də komandaya birgünlük istirahət veriləcək, noyabrın 6-dan isə məşqlər bərpa olunacaq. Cavab oyunu noyabrın 10-da Tovuzda keçiriləcək və Turan doğma azarkeşlər qarşısında uğurlu nəticə əldə etməyə çalışacaq.

Mənbə: Sportinfo.az

Hazırladı: GettoSport