U-15 dünya çempionatına 18 ölkə Bakıya gəlmədi

24 oktyabr 2026 — Bakıda təşkil olunan U-15 yaş qrupları arasında dünya çempionatı və festivalında 18 ölkə iştirakdan imtina edib. Turnirdə ümumilikdə 189 komanda qeydiyyatdan keçib; yarış oktyabrın 30-dək davam edəcək.

Ukrayna Futbol Assosiasiyası bildirib ki, onların U-15 komandası bu yarışda əvvəlcədən planlaşdırılmamışdı. UAF açıqlamasında turnirin formatının eksperimental olması əsas səbəblərdən biri kimi göstərilib: “Turnirin formatı kifayət qədər eksperimentaldır – 8×8, 20 dəqiqəlik hissələr və futbolçuların gün ərzində bir neçə oyun keçirməsi nəzərdə tutulur”.

Ukrayna komandası Azərbaycana gəlmək əvəzinə Türkiyədə keçirilən turnirdə iştirak edəcək; orada Portuqaliya, Danimarka və Niderland kimi yığmaların da mübarizə aparacağı bildirilib.

UAF-ın məlumatına görə, Rusiya yığmasının festivala dəvət olunması barədə xəbər Ukraynanın iştirakdan imtina etməsi qərarından sonra yayılıb. UAF Avropanın digər futbol assosiasiyaları ilə əlaqə saxlayıb və bəzi ölkələrin Rusiya ilə qarşılaşmayacaqlarını bildirdiyi qeyd olunub.

Turnirdə iştirakı rəsmən ləğv edən 18 millidən 16-sının adları açıqlanıb:

• Ukrayna
• Almaniya
• Niderland
• Avstriya
• Belçika
• Danimarka
• Norveç
• İsveç
• İsveçrə
• Rumıniya
• Serbiya
• Sloveniya
• Finlandiya
• İslandiya
• San Marino
• ABŞ

Turnirin təşkilati detalları və qalan ölkələrin iştirak durumu barədə əlavə məlumat veriləcək.

Mənbə: GettoSport