UEFA İsrail və İrlandiya matçındakı insidenti araşdırır

UEFA Millətlər Liqasında İsrail və İrlandiya yığmaları arasında baş verən insidentlə əlaqədar intizam araşdırmasına start verilib. Avropa futbol qurumu rəsmi şəxslərin və hakimlərin hesabatları əsasında araşdırma aparacağını açıqlayıb.

Məlumata görə, oktyabrın 4-də Serbiyanın Baçka-Topola şəhərində azarkeşsiz keçirilən və 1:1 hesabı ilə başa çatan qarşılaşmanın fasiləsi zamanı tuneldə insident yaşanıb. İddialara əsasən, İsrail millisinin futbolçularından biri İrlandiya yığmasının məşqçilər korpusunun üzvü, fiziki hazırlıq üzrə məşqçi Damiən Doyla tüpürüb. İsrail Futbol Assosiasiyasının nümayəndəsi isə bu ittihamı qətiyyətlə təkzib edərək belə bir halın baş vermədiyini bildirib.

İrlandiya millisinin baş məşqçisi Heymir Hallqrimsson matçdan sonra komandasının görüşə hazırlıq prosesində müəyyən təxribatlarla qarşılaşdığını, lakin futbolçuların vəziyyətin böyüməsinə imkan vermədiyini qeyd edib. Xatırladaq ki, İrlandiyanın ev sahibliyi etməli olduğu bu oyun təşkilati çətinliklər səbəbindən Dublindən Serbiyaya köçürülmüşdü.