Vadim Krıçımari vəfat etdi: 38 yaşlı keçmiş Muğan hücumçusu

5 noyabr 2026 — Moldovalı keçmiş hücumçu Vadim Krıçımari 38 yaşında dünyasını dəyişib. Onun vəfatı 2021–2022 mövsümündə çıxış etdiyi Rumıniyanın Otselul Qalatsi klubu tərəfindən açıqlanıb. Bu barədə Offsideplus.az məlumat yayıb.

Kıçımarinin yaxınları və klubun bildirdiyinə görə, o, bu il mart ayında nadir və çox aqressiv sayılan 4-cü dərəcəli Bürkitt limfoması diaqnozu ilə üzləşmişdi. Müalicə üçün ailə və dostlar tərəfindən başladılan yardımlar sayəsində 23.000 avrodan artıq vəsait yığılıb. O, İtaliyadakı ixtisaslaşmış klinikada müalicə almasına baxmayaraq, xəstəlikdən sağ qala bilməyib.

Karyerası ərzində Krıçımari Moldova, Rusiya və Rumıniyanın müxtəlif komandalarında çıxış edib. Klub səviyyəsində oynadığı komandalar arasında Zimbru Çişinau, Dinamo-Auto, Daçiya Buyukani və Otselul Qalatsi göstərilir. O, həmçinin 2009–2011-ci illərdə Azərbaycanın Muğan klubunun heyətində də yer alıb.

Son illərdə uşaq futbol məktəbində məşqçi kimi çalışan Krıçımari arxasında həyat yoldaşı Viktoriya, 11 yaşlı qızı Rianna və 5 yaşlı oğlu Raulu qoyub. Otselul Qalatsi klubunun paylaşımında ailəyə başsağlığı verilib.

Mənbə: Offsideplus.az

Hazırladı: GettoSport