Xankəndi Ultramarafonu Qəbələdə start götürdü

08 oktyabr 2026 — Qəbələ. Gənclər və İdman Nazirliyi, Azərbaycan Atletika Federasiyası və Bakı Şəhər Halqasının birgə təşkilatçılığı ilə üçüncü Beynəlxalq Xankəndi Ultramarafonuna Qəbələ şəhərində start verilib.

Yarış öncəsi iştirakçılar Ulu Öndər Heydər Əliyevin Qəbələdakı abidəsini ziyarət edib və önünə gül dəstələri qoyublar. Tədbirdə Dövlət Himni ifa olunub və Vətən uğrunda həlak olan şəxslərin xatirəsi bir dəqiqəlik sükutla yad edilib.

Gənclər və İdman Nazirliyinin İdman şöbəsinin müdiri Elnur Məmmədov tədbirin əhəmiyyətini vurğulayaraq bildirmişdir: "Ötən il bildiyiniz kimi, Qəbələ idman paytaxtı idi. Hər kəs bu yarışı maraqla gözləyir. İşğaldan azad olunan ərazilərdə idman tədbirlərinin təşkili sevindirici məqamdır. Buna görə Prezident İlham Əliyevə dərin təşəkkürümüzü bildiririk".

Azərbaycan Atletika Federasiyasının baş katibi Məhərrəm Sultanzadə isə atletikaya marağın yüksək olduğunu və xarici idmançıların iştirakını müsbət hal kimi qiymətləndirib, işğaldan azad olunan ərazilərin dövlət dəstəyi ilə inkişaf etdiyini qeyd edib.

Yarışda 5 ölkədən 97 atlet iştirak edir. Beynəlxalq ultramarafonun əsas məqsədi sağlam həyat tərzinin və qaçış idmanının təbliği, eləcə də Azərbaycanın müxtəlif bölgələrinin idman vasitəsilə tanıdılmasıdır. Ümumi marşrut Qəbələ–Xankəndi olmaqla 192 kilometr təşkil edir.

• Qəbələ–Ağdaş: 55 km
• Ağdaş–Bərdə: 65 km
• Bərdə–Ağdam: 44 km
• Ağdam–Xankəndi: 28 km

Ultramarafon dörd mərhələdən ibarətdir; hər mərhələnin qalibləri ayrıca təltif olunacaq, ümumi nəticə üzrə isə baş mükafat təqdim ediləcək.

Qeyd edək ki, Xankəndi Ultramarfonu ilk dəfə 2024-cü ildə Xankəndi–Bakı marşrutu üzrə 380 km məsafədə keçirilib və dörd ölkədən 64 atlet iştirak etmişdi. 2025-ci ildə yarış Qəbələ–Xankəndi marşrutu üzrə təşkil olunmuş və ona altı ölkədən 81 atlet qatılmışdı. 2026-cı ildə üçüncü dəfə keçirilən tədbir yenə Qəbələ–Xankəndi marşrutu üzrə keçirilir.