Xankəndidə yeniyetmə cüdo seminarı keçirildi

3 noyabr 2026 — Xankəndi şəhərində yeniyetmə oğlanlardan ibarət cüdoçular üçün seminar keçirilib. Təlimi milli komandanın məşqçiləri Kotaro Sasaki və Asiman Allahverdiyev, eləcə də Azərbaycan Cüdo Federasiyasının Təhsil şöbəsinin eksperti Elçin Mayılov aparıblar. Bu barədə Sportinfo.az məlumat yayıb.

Seminar zamanı iştirakçılara isinmə və koordinasiya hərəkətləri əyləncəli oyunlar vasitəsilə göstərilib, cüdonun əsas hazırlıq elementlərindən olan uçi-komi və naqe-komi üzrə çalışmalar təşkil olunub. Məşqçilər və ekspert texnikaların düzgün tətbiqinə nəzarət ediblər.

Texniki blokda ko-uçi-qari, o-uçi-qari və seoi-naqe fəndlərinin icra mexanizmi, giriş və tamamlanma mərhələləri ətraflı izah olunub və praktik məşqlərlə möhkəmləndirilib.

Seminarın əsas məqsədi uşaq və yeniyetmə cüdoçuların texniki bacarıqlarını inkişaf etdirmək, düzgün hərəkət vərdişlərinin formalaşmasına dəstək vermək və onların məşq prosesinə marağını artırmaq olub.

Mənbə: Sportinfo.az

Hazırladı: GettoSport