Zaqatala baş məşqçisi 0:6 məğlubiyyətin məsuliyyətini üzərinə götürdü

2026-10-08 — Birinci Liqanın dördüncü turunda oktyabrın 7-də lider Şahdağ Qusarla qarşılaşmada 0:6 hesablı ağır məğlubiyyət yaşayan Zaqatala-nın baş məşqçisi Rakif Əliyev nəticənin məsuliyyətini öz üzərinə götürdüyünü bildirib.

Əliyev matçdan sonra verdiyi açıqlamada komandanın istədiyi oyunu həyata keçirə bilmədiyini, boşluqların olduğunu və bu məğlubiyyətin cavabdehliyini qəbul etdiyini vurğulayıb: “Dünən həqiqətən çox məyus olduq. Oyun istədiyimiz kimi alınmadı. Görünən budur ki, hardasa boşluq vermişəm. Məsuliyyət mənim üzərimdədir”.

Baş məşqçi həmçinin rəqibin bütün oyun komponentlərində üstün göründüyünü, yaxşı hazırlaşdıqlarının hiss olunduğunu və futbolçuları günahlandırmadığını deyib: “Rəqibi təhlil etmişdik, futbolçuları da bu barədə məlumatlandırmışdıq. Oyunçular meydanda tapşırıqları yerinə yetirməyə çalışsalar da, istədiklərimizi həyata keçirmək mümkün olmadı. Futbolçuları günahlandırmıram, məğlubiyyətə görə mən cavabdehlik daşıyıram. ‘Şahdağ Qusar’ bütün oyun komponentlərində bizdən üstün görünürdü. Keyfiyyətli oyunçulardan qurulmuş, döyüşkən rəqiblə qarşılaşdıq. Oyuna çox yaxşı hazırlaşdıqları hiss olunurdu. Rəqibə uğurlar arzulayıram. Biz də çalışacağıq ki, gələcəkdə belə səhvləri təkrarlamayaq”.