AFFA rəsmisi Hövsan kompleksinin ot örtüyünü yüksək qiymətləndirdi

8 oktyabr 2026 — AFFA-nın baş katibinin müşaviri Ramazan Səmədov yeni inşa edilmiş Hövsan Yarış Kompleksində jurnalistlərə açıqlama verərək kompleksin U-15 dünya çempionatı və festivalına hazır olduğunu bildirib.

Səmədov deyib ki, sahə iki ay əvvəl tamamilə başqa görkəmə malik imiş və hazırda FIFA standartlarına uyğun 10 meydança yaradılıb: "Bunlar cəmi 66 günə həll edilib. Sağ olsunlar, dövlət qurumları ilk günlərdən bizə dəstək oldular. Azərbaycan futbolu üçün böyük işlər görülüb. U-15 Dünya Çempionatı bu işlər üçün təkan idi."

O, stadionların ot örtüyünün FIFA tələblərinə cavab verdiyini vurğulayıb: "Hazırda ərazidə FIFA-nın nümayəndələri də var. Bu kompleks uşaq futbolunun inkişafı üçün nəzərdə tutulub. FİFA-nın standartlarına uyğun ot örtüyüdür. Xalq dilində desək, bundan daha yaxşısı yoxdur".

Səmədov AFFA nümayəndəsi olaraq FIFA prezidenti Canni İnfantinonun kompleksə gəlişindən də danışıb: "O, işlərin belə sürətlə yekunlaşdığını heç bir ölkədə görmədiyini bildirdi."

Açıqlamada kompleksdə tribunaların quraşdırılması planı barədə də məlumat verilib — iki stadionda 100, digər stadionlarda isə 50 nəfərlik tribunalar nəzərdə tutulur.

Xatırladaq ki, U-15 dünya çempionatı və festivalı 22–30 oktyabr 2026-cı il tarixlərində Hövsan Yarış Kompleksində keçiriləcək; turnirin açılış və final görüşü Bakı Kristal Zalında təşkil olunacaq.