Akrobatika və aerobika üzrə ölkə birincilikləri başa çatdı

Bakı, Milli Gimnastika Arenasının köməkçi zalı — Oktyabrın 27-28-də akrobatika və aerobika gimnastikası üzrə ölkə birincilikləri başa çatıb. Akrobatika gimnastikası 31-ci, aerobika gimnastikası isə 10-cu dəfə təşkil olunub.

İki gün davam edən yarışlarda müxtəlif idman klublarının təmsilçiləri müxtəlif yaş kateqoriyaları və proqramlar üzrə çıxış ediblər. Akrobatika yarışlarının son günündə kiçiklər, uşaqlar və yeniyetmələr kateqoriyalarında qadın cütlükləri, qadın qrupları və qarışıq cütlüklər temp və qarışıq hərəkətlər proqramlarında meydana çıxıblar.

Günün ikinci yarısında aerobika gimnastikası üzrə mübarizə davam edib. Uşaqlar, yeniyetmələr və gənclər kateqoriyalarında üçlüklər, qarışıq cütlüklər və qruplar proqramlarında yarışan gimnastlar bacarıqlarını nümayiş etdiriblər.

Hər iki növdə yarışlar başa çatdıqdan sonra mükafatlandırma mərasimləri keçirilib və müxtəlif yaş kateqoriyaları ilə proqramlarda fərqlənən gimnastlara medal və diplomlar təqdim olunub.

Mənbə: GettoSport