Antonio Simoeş Kriştiano Ronaldonu tənqid etdi

09 oktyabr 2026 — Portuqaliyanın 1966-cı il dünya çempionatında bürünc medal qazanmış əfsanəsi Antonio Simoeş Kriştiano Ronaldonun milli komanda düşərgəsindəki açıqlamalarına münasibət bildirib və baş verən münaqişənin sülh yolu ilə həll olunmasını təklif edib.

Simoeş Ronaldonun çıxışını haqlı saymadığını söyləyib: “Kriştiano Ronaldonu haqlı çıxarmağa ehtiyacımız yoxdur və mən onun hazırda haqlı olduğunu düşünmürəm. Amma səhv etdiyini etiraf edərsə, onu mühakimə etməməliyik. Gəlin ona şans verək, xüsusən də vəzifəsinə və nüfuzuna uyğun vida mərasimi üçün”.

O, Rolandonun xarakterinə dair də fikirlərini bölüşərək bəzi hallarda yalnız özünü düşündüyü təəssüratı yarandığını qeyd edib: “Bəzən biz onun yalnız özü haqqında düşündüyünü hiss edirik. Cənubi Afrikada keçirilən Dünya Kubokunda bu təcrübəni yaşadım... o, yetkinləşib, kişi olub və eqoist olmayan bir düşüncə tərzi tapmalıdır”.

Simoeş 41 yaşlı Ronaldonun millidə hələ real töhfə verib-vermədiyi barədə də şübhəli olduğunu vurğulayıb: “Buna şübhələrim var. Bu, sadəcə faydalı olmaqdan daha çox şey tələb edir... adınızın yaratdığı böyük nüfuza görə iştirakınız təsirli ola bilər”.

Əfsanə həmçinin Ronaldonun millidən kənarda qalmasının komanda üzvlərinə təsirini minimal sayıb: “Oyuna baxanda komandaya ən kiçik bir təsir görmürəm; heç nə, sıfır”. Simoeş həmçinin istehza ilə Ronaldonun çox uzun müddət — “1000 qol vurduqdan sonra 49 yaşına qədər” — millidə qalacağı ilə bağlı fikirlər səsləndirib və yekunda sual qoyub: “41 yaşlı bir kişi futbol oynayır... İşdən çıxsa, daha yaxşı olmazdımı?”