Araz-Naxçıvan Çempionlar Liqasında hədəfini açıqladı

Araz-Naxçıvanın yeni prezidenti Mahmud Sadıqov komandanın Çempionlar Liqasında Qlivitsedəki çıxış hədəfini və heyətdəki dəyişiklikləri açıqlayıb.

GettoSport redaksiyası•17:43 · 1 saat əvvəl•1 dəq oxu

Paylaş

Oxundu Sonra oxu

Araz-Naxçıvan futzal komandası və prezident Mahmud Sadıqov Qlivitsedə — Foto: İdman.biz

26 oktyabr 2026. Araz-Naxçıvan futzal klubunun yeni prezidenti Mahmud Sadıqov komandası ilə birlikdə Çempionlar Liqasının 5-ci qrupunun oyunlarının keçiriləcəyi Polşanın Qlivitse şəhərində olduğunu və əsas məqsədlərinin qalib gəlmək olduğunu bildirib.

Sadıqovun sözlərinə görə, klubun hədəfi dəyişməzdir: “Bu gün də hədəfimiz eynidir”. O, Araz-Naxçıvanın Avropada futzalın bir markası olduğunu vurğulayaraq, rəhbərlik, oyunçu və məşqçi heyətinin bu ənənəni davam etdirməyə çalışdığını söyləyib.

Araz-Naxçıvanın heyətində ötən ilə nisbətən dəyişikliklər olduğunu qeyd edən M.Sadıqov deyib ki, keçən il komandada altı legioner oynayırdısa, bu il onların sayı xeyli azdır və kollektiv əsasən milli komandanın oyunçularından ibarətdir: “Rəqiblərə qarşı tam gücünü ortaya qoyacaq bir əhvali-ruhiyyədəyik”.

Funksioner turnirdəki rəqiblər barədə də danışıb. O, ilkin mərhələdən gələn Bosniya və Macarıstan çempionlarını qeyd edib və əsas rəqibin Polşanın Piast komandası olacağını vurğulayıb: “Onların heyətində yaxşı oyunçular cəmləşib, bildiyim qədər bir neçə legioner də var”.

Sadıqov həmçinin Araz-Naxçıvanın rəqiblərdən qorxmadığını bildirib: “Onlar bizi qorxutmur. Araz-Naxçıvan meydana çıxıb oyunu oynayana qədər heç kimdən qorxmayıb... Ümid edirəm ki, burada da layiqincə çıxış edib Vətənə sevincli xəbərlərlə dönəcəyik”.