Oktay Rüstəmli Araz-Naxçıvanın şanslarını qiymətləndirdi

29 oktyabr 2026 — Araz-Naxçıvanın futzalçısı Oktay Rüstəmli UEFA Çempionlar Liqasının əsas mərhələsində Macarıstanın Uypest klubuna qarşı matçda het-trik etməsi və Bosniya təmsilçisi Buba Mara ilə görüşdə qol vurması barədə danışıb. Hücumçu açıqlamasını Azərbaycan Futzal Federasiyasına verib.

Rüstəmli Uypestlə oyunu çətin, lakin komandası üçün uğurlu keçdiyini deyib: “Uypestlə oyun kifayət qədər maraqlı keçdi. Həm atmosfer, həm də komandaların nümayiş etdirdiyi oyun baxımından bunu deyirəm. Üstün tərəf biz idik, yaratdığımız qol epizodlarının da əksəriyyətini realizə etdik və yekunda qələbə qazandıq. Hesab da göstərir ki, Macarıstan çempionu ilə görüşümüz kifayət qədər çətin, gərgin keçdi.”

Hücumçu het-trikə münasibətini belə ifadə edib: “Həmin matçda het-trik etdim və UEFA bayrağı altında keçirilən oyunda bunu aktivinə yazdırmağı hər bir futzalçıya arzulayıram. Düzdür, vacib olan komandanın uğur qazanmağıdır, vurduğum qollar da bunu əldə etməyimizə çox kömək oldu. Het-triki komanda yoldaşım da etsəydi, özüm qədər sevinərdim.”

Buba Mara ilə məğlubiyyəti şans itkisi kimi dəyərləndirən Rüstəmli əlavə edib ki, rəqib imkanlarını yaxşı qiymətləndirərək qələbə qazanıb: “Buba Mara”ya məğlubiyyətə gəldikdə, “Uypest”lə matçdakından daha çox qol epizodu yaratmışdıq, təəssüf ki, cəmi 3-nü reallaşdıra bildik. Halbuki daha çox qol vurmalı idik. Rəqib bizdən üstün deyildi, sadəcə onlar imkanlarını düzgün qiymətləndirdilər. Qol vursam da, qələbə qazana bilmədiyimizə görə məyus oldum.”

O, qrupdan növbəti mərhələyə yüksəlmək şanslarının hələ də davam etdiyini və son turun gərgin keçəcəyini vurğulayıb: “Şanslar davam edir. Turnir cədvəlinə baxsaq, hər bir komandanın lider olmaq şansının davam etdiyini görərik. Son turun oyunları bu baxımdan gərgin keçəcək. Təbii ki, çalışacağıq ki, 1/8 finala yüksələn komanda “Araz-Naxçıvan” olsun.”

Qeyd edək ki, Araz-Naxçıvan UEFA Çempionlar Liqasının əsas mərhələsində Buba Mara klubuna 3:5 hesabı ilə məğlub olub.

Mənbə: GettoSport