Azərbaycan cüdo yığması geniş heyətlə Fransada tənqid olundu

6 oktyabr 2026 — Fransada çıxan ixtisaslaşmış nəşrlər Bakıda keçirilən 2026-cı il dünya çempionatında Azərbaycanın geniş heyətlə iştirakı barədə etirazlar səsləndiriblər. Xəbərlərdə ölkəmizin fərdi yarışlarda 17 kişi cüdoçu ilə təmsil olunması xüsusi olaraq qeyd edilir.

Fransız nəşrləri «L'Équipe» və «L'Esprit du Judo»nun materiallarında bu vəziyyət ev sahibi ölkəyə üstünlük verən təcrübə kimi qiymətləndirilib; «L'Esprit du Judo» bunu «17-lik qalmaqal» adlandırıb. Tənqidçilərin əsas arqumenti bəzi çəki dərəcələrində üç idmançının iştirakı ilə rəqabətin pozulmasıdır.

Bununla belə, məsələnin texniki tərəfi dərc olunan yazılarda əks olunub: Azərbaycan reqlamentin heç bir bəndini pozmayıb. Beynəlxalq Cüdo Federasiyasının (IJF) 2025-ci ildə tətbiq etdiyi qaydaya əsasən, dünya çempionatının təşkilatçıları əlavə "wild card"lara namizədlik irəli sürə və IJF tərəfindən təsdiq oluna bilən əlavə yerlər götürə bilərlər.

IJF-nin İdman və təşkilati reqlamentinin 4.4-cü maddəsinə görə, əsas kvota bir federasiyadan maksimum 9 kişi və 9 qadın idmançını nəzərdə tutur, lakin ev sahibi üçün əlavə yerlər mümkündür. IJF-in baş idman direktoru Vladimir Barta da vurğulayıb ki, bu sistem böyüklər üzrə 2025-dən tətbiq olunur və əlavə yerlər avtomatik deyil, yerli təşkilat komitəsinin müraciəti və IJF təsdiqi ilə verilir. Barta həmçinin qeyd edib ki, dünya reytinqində yalnız hər ölkə üçün 9 kişi və 9 qadın idmançının nəticələri nəzərə alınır.

Qeyd edilir ki, Azərbaycan reqlament çərçivəsində 8 kişi və 1 qadın üçün əlavə iştirak yeri əldə edib. Analogiya üçün xatırladılır ki, 2025-ci ildə Budapeştdə ev sahibi Macarıstan da yeni qaydadan istifadə edərək ümumilikdə 21 cüdoçu ilə çıxış etmişdi.