Bernd Rayxart Real Madrid-də biznes rəhbəri təyin olundu

15 oktyabr 2026, Cümə axşamı.

Real Madrid klubunda yeni təyinat həyata keçirilib: Avropa Superliqası layihəsi ilə tanınan almaniyalı funksioner Bernd Rayxart klubun biznes əməliyyatları üzrə rəhbəri vəzifəsinə gətirilib.

Rayxart klubun kommersiya fəaliyyətinin əsas istiqamətlərinə, o cümlədən Santyaqo Bernabeu stadionunun biznes əməliyyatlarına, sponsorluq müqavilələrinə və klubun rəsmi məhsullarının satışına nəzarət edəcək.

Yeni rəhbər birbaşa klubun baş direktoru Xose Anxel Sançesə tabe olacaq. Bildirilir ki, Rayxart uzun müddət vakant qalan bu vəzifəni tutacaq.

Bernd Rayxart daha çox Avropa Superliqası layihəsindəki fəaliyyəti ilə tanınır; o, 2022-ci ilin oktyabrından layihənin təşkilatçısı olan A22 Sports Management şirkətinin baş direktoru olub. Bundan əvvəl Rayxart RTL media qrupunda və İspaniyanın Atresmedia televiziya şirkətində yüksək rəhbər vəzifələrdə çalışıb.

Klub rəhbərliyinin Rayxartın idman yayım hüquqları, media və kommersiya idarəçiliyi sahələrindəki təcrübəsini Real Madrid-in biznes fəaliyyətində istifadə etməyi planlaşdırdığı vurğulanır.

Mənbə: GettoSport