Edmond Klaus Kəpəz Futbol Akademiyasında görüş keçirib

AFFA-nın texniki direktoru Edmond Klaus və onun köməkçisi Ramiz Kərimov oktyabrın 4-də Gəncədə yerləşən Kəpəz Məşq Mərkəzi və Futbol Akademiyasının qonağı olublar. Görüşdə akademiya rəhbərliyi, o cümlədən PFK İB-nın sədri Anar Abdullayev və akademiyanın koordinatoru Vasif Vəliyev iştirak edib.

Anar Abdullayev Prezident İlham Əliyevin tapşırığına əsasən bu il oktyabrın sonlarında Bakıda U-15 dünya çempionatının keçiriləcəyini və Hövsan qəsəbəsində 10 meydançanın inşa edildiyini vurğulayıb. O, yarışın festival şəklində keçiriləcəyini, həmçinin gələn il 20 yaşadək futbolçular arasında dünya çempionatının oyunlarının ölkəmizdə təşkil olunacağını qeyd edib.

Abdullayev həmçinin Gəncədə müasir standartlara uyğun stadionun tikildiyini, AFFA-nın Kəpəzə davamlı dəstək göstərdiyini və akademiyada hazırda 13 komandada 260 uşağın futbolla məşğul olduğunu söyləyib. O, akademiyanın inkişafının və gələcəkdə əsas komandada yerli futbolçuların çıxış etməsinin prioritet olduğunu əlavə edib.

Müzakirələr və təkliflər

Edmond Klaus akademiyada aparılan işləri yüksək qiymətləndirərək, aşağı yaş qruplarından futbolçu yetişdirməyin çətin olduğunu bildirib və bu səbəbdən aşağı yaş çempionatlarının formatında dəyişiklik təklif etdiyini deyib. Klaus məqsədin gələcəkdə yeni futbolçu nəsli yetişdirmək və uzunmüddətli ekosistem yaratmaq olduğunu vurğulayıb:

“Kəpəzdə sizin gördüyünüz işlər səbir, əzm, güc tələb edir... Qarşımıza uzunmüddətli ekosistem yaratmaq vəzifəsi qoyulub.”

Görüş çərçivəsində Klaus, akademiya koordinatoru Vasif Vəliyev və məşqçi-texniki heyətlə aşağı yaş qrupları üzrə çempionatların təşkili, fəaliyyət konsepsiyası və yeni format üzərində fikir mübadiləsi aparılıb. Anar Abdullayev qonaqları akademiyanın şəraiti, Gəncə Şəhər Stadionu və ehtiyat meydançalarla tanış edib.