Ferstappen və Louson Meksikada start mövqeyini itiriblər

Oktyabrın 30-da keçirilən sərbəst yürüşlər zamanı baş verən insidentə görə Maks Ferstappen və Liam Louson cəzalandırılıblar. FIA stüardları Rodriqes Qardaşları trasının 12-ci və 13-cü döngələri arasında toqquşan pilotların yarışa bir pillə geridən start verəcəyini açıqlayıb. Bu barədə Kokpit.az məlumat yayıb.

Hadisə zamanı 3 nömrəli bolidlə hərəkət edən Ferstappen sürətli dövrəyə hazırlaşırdı, 30 nömrəli bolidin pilotu Louson isə soyutma dövrəsini tamamlayırdı. Stüardlar pilotların komanda rəhbərləri ilə sessiyadan əvvəl keçirilən görüşlərdə verilən xəbərdarlıqlara məhəl qoymadıqlarını və davranışlarının qəbuledilməz olduğunu vurğulayıblar.

Qərara əsasən, hər iki sürücünün superlisenziyasına bir cərimə xalı da əlavə edilib. Rəsmi açıqlamada bildirilib ki, bu cəza sərbəst yürüşlərdə oxşar təhlükəli halların qarşısını almaq və əvvəlki illərin təcrübəsinə uyğun olaraq nizam-intizamı qorumaq məqsədi daşıyır.

Mənbə: Kokpit.az

Hazırladı: GettoSport