Formula 1 V8 turbo hibrid mühərrik dövrünə hazırlanır

28 oktyabr 2026 — FIA gələcək Formula 1 mühərrik reqlamentinə dair sənəd hazırlayıb və hazırda istehsalçılarla müzakirəyə təqdim etdiyi bildirilir; dəyişikliklərin 2030 və ya 2031 mövsümündə qüvvəyə minməsi nəzərdə tutulur.

Təklifdə əsas yenilik 2,0–2,3 litrlik V8 turbo hibrid mühərriklərin tətbiqidir. Daxiliyanma mühərrikinin təxminən 900 at gücü hədəfləndiyi, elektrik mühərrikinin gücünün 200 kVt (təxminən 272 at gücü) olacağı və davamlı istifadə üçün 100 kVt ilə əlavə 100 kVt-ın ötmə/hücum rejimi üçün nəzərdə tutulduğu göstərilir. Enerji bərpası 200 kVt-a qədər planlaşdırılır.

Təklifdə məqsəd mövcud güc qurğularına nisbətən xərcləri təxminən 50 faiz azaltmaq, bolidin ümumi çəkisini təxminən 80 kiloqram yüngülləşdirməkdir. Yeni arxitektura nəticəsində daxiliyanma mühərriki ilə elektrik sisteminin birgə işi ümumi gücü təxminən 1000 at gücünə çatdıra bilər.

Sənəddə mövcud 1,6 litrlik V6 mühərriklərinin iki silindr əlavə edilməklə V8-ə çevrilməsi imkanı da nəzərdən keçirilir ki, bu da istehsalçıların xərclərini və inkişaf müddətini azaltmağa kömək edə bilər. Digər variant kimi müstəqil istehsalçıların ümumi arxitektura hazırlaması göstərilir.

FIA-nın əsas məqsədi sürücülük bacarıqlarını önə çıxarmaq, emisyonları azaltmaq, davamlı yanacaqdan istifadəni davam etdirmək və yeni istehsalçıların F1-ə qoşulmasını asanlaşdırmaqdır. Qeyd etmək lazımdır ki, təqdim olunan rəqəmlər rəsmi yekun qaydalar deyil və istehsalçılarla müzakirələr əsasında dəyişə bilər.

Mənbə: GettoSport