Fred Erik Ten Haqı açıqlamasında sərt tənqid etdi

Mançester Yunayted-in sabiq yarımmüdafiəçisi Fred YouTube-da yayımlanan Charla Podcast müsahibəsində Erik Ten Haqın İngiltərə klubundakı rəhbərliyini kəskin tənqid edib. O, həm məşqçi keyfiyyətlərinə, həm də Ten Haqın insan kimi davranışına toxunub.

"Ten Haq bir məşqçi kimi fəlakət idi. O, hamı ilə mübahisə edirdi - mənimlə, Kriştiano Ronaldo ilə, Kazemiro ilə, Reşfordla. Yalnız onun niderlandlı oyunçuları oynayırdılar. Lakin müsbət tərəfi odur ki, o, yenə də braziliyalılara qiymət verirdi və mənə onun futbol ideyaları xoş gəlirdi. Ten Haq taktiki cəhətdən işlədiyim ən yaxşı məşqçilərdən biridir. Ancaq insan kimi yox. O, özünü əsl alçaq kimi aparırdı"

Müsahibədə Fred Ten Haqın taktiki yanaşmasını bəyənməsinə baxmayaraq, onun komanda daxilində münasibətlərini və oyunçularla ünsiyyətini sərt sözlərlə pisləyib. O, məşqçinin daha çox niderlandlı futbolçulara üstünlük verdiyini və bu səbəbdən komanda daxilində gərginlik olduğunu vurğulayıb.

Xatırladaq ki, Fred Ten Haqın rəhbərliyi altında Mançester Yunayted-in heyətində 56 matç keçirib, 6 qol vurub və 6 məhsuldar ötürmə edib.