Kənan Qasımov dünya çempionatında bürünc medal qazandı

12 oktyabr 2026 — Cüdo üzrə kişilər arasında +100 kq çəki dərəcəsində çıxış edən Kənan Qasımov dünya çempionatında bürünc medal qazanıb. Yarışdan sonra o medalı anasına həsr etdiyini açıqlayıb və gələcək hədəflərindən danışıb.

Qasımov bildirib: “Medalımı məni hazırda izləyən anama həsr edirəm. O, həmişə mənim üçün dua edib. Anama söz verirəm ki, qarşıda daha böyük uğurlarım olacaq. Ananın duası çox böyükdür”.

İdmançı böyüklər səviyyəsində ilk dünya çempionatında iştirak etdiyini, özünə inanaraq finala qədər getməyi arzuladığını deyib. O ikinci görüşdə ukraynalı rəqibinə məğlub olduqdan sonra Uşangi Retari ilə görüşə qısa müddət ərzində çıxdığını, yorğunluğun nəticəyə təsiri olduğunu qeyd edib: “Yorğun olduğuma görə məğlub oldum. Amma Uşangi Retari, həqiqətən də, güclü idmançıdır. O, böyüklər arasında ikinci dəfə dünya çempionatının gümüş medalını qazandı”.

Qasımov həmçinin komandada məşq yoldaşı olan Camal Qamzatxanovu iki dəfə məğlub etməsinin onun üçün xüsusi önəm daşıdığını vurğulayıb: “Camal mənim dostumdur, həm də məşq yoldaşımdır... Ona görə ehtiyatla güləşdim və onu məğlub etdim”.

Müsabiqədə bürünc medal qazanandan sonra Kənan Qasımov dövlət rəhbərini izləyicilər arasında gördüyünü və Azərbaycan əsgəri salamı ilə minnətdarlığını bildirdiyini bildirib. Gələcək hədəfləri arasında oktyabrın 31-də İtaliyada keçiriləcək U-23 Avropa çempionatında ikinci dəfə qələbə qazanmaq və ağır çəkidə ikiqat Avropa çempionu olmaq hədəfi var. O, həmçinin Olimpiya Oyunlarında medal qazanacağına söz verib: “Bəli, söz verirəm ki, Olimpiya Oyunlarına, qismət olarsa, düşsəm, oradan medalla qayıdacağam”.

Mənbə: GettoSport