Naxçıvan Sumqayıtı məğlub edərək ilk qələbəsini qazandı

10 oktyabr 2026 — Azərbaycan Basketbol Liqasının ikinci turunda "Naxçıvan" "Sumqayıt"ı məğlub edərək mövsümdə ilk qələbəsini qazandı. Oyun sonrası hər iki komandanın baş məşqçisi görüşü dəyərləndirib.

"Naxçıvan"ın baş məşqçisi Georgi Kondruseviç klubun mətbuat xidmətinə bildirib ki, komanda üçün hazırlıq müddəti məhdud olub: "Bizim üçün çətin oyun idi, çünki hazırlığa çox vaxtımız olmayıb. Yalnız sentyabrın 27-dən tam heyətlə məşq edirik və bu da müəyyən çətinliklər yaradırdı. Buna baxmayaraq, basketbolçular yaxşı mübarizə apardılar, həm komandanı, həm də azarkeşləri sevindirdilər. Bu qələbə bizim üçün irəliyə doğru ciddi addım oldu. Bununla belə, oyunumuzun keyfiyyətini artırmaq üçün hələ çox çalışmalıyıq."

"Sumqayıt"ın baş məşqçisi Uğur Özdəmir məğlubiyyəti gözlənilməz adlandırıb və əsas problemlərdən birinin hücumların qurulması zamanı buraxılan səhvlər olduğunu vurğulayıb: "Gözləmədiyimiz məğlubiyyətlə üzləşdik. Rəqib yaxşı oynadı, onları qələbə münasibətilə təbrik edirəm. Komandamız cəmi 15 gün əvvəl formalaşıb və mübarizə aparmağa çalışdıq. Ancaq sadə səhvlərə yol verdik. Xüsusilə hücumları qurarkən top itkilərimiz çox oldu. Rəqib də bundan istifadə edərək sürətli əks-hücumlar təşkil etdi. Məğlubiyyətimizin əsas səbəbi bu idi. Yeni komanda olduğumuzu nəzərə alsaq, o qədər də pis oynadığımızı düşünmürəm. Biz mütləq daha güclü olacağıq! Bizi dəstəkləməyə gələn azarkeşlərə təşəkkür edirəm. Narahat olmasınlar, onları hələ qələbələrlə sevindirəcəyik. Qarşıda uzun yolumuz var."

Qeyd edək ki, bu qarşılaşma "Naxçıvan" üçün cari mövsümdə ilk, "Sumqayıt" üçün isə çempionatdakı ilk məğlubiyyət olub.