Rimantas Turskis Bakıda xatirələrini və oyun təəssüratını paylaşdı

Litvanın sabiq futbolçusu Rimantas Turskis Tofiq Bəhramov adına Respublika Stadionunun 75 illik yubileyinə həsr olunan "Neftçi" və "Spartak Vilnüs" veteranları görüşü ilə bağlı təəssüratlarını bölüşüb. O, belə qarşılaşmaların dostluq münasibətlərini gücləndirdiyini vurğulayıb.

Turskis bildirib ki, belə görüşlər "yalnız dostluq üçündür, insanları bir araya gətirir" və veteran matçlarının əsas məqsədi də məhz budur.

Sabiq futbolçu Azərbaycana gəldiyi zaman keçirdiyi peşəkar qarşılaşmalardan da danışıb. O, bir vaxtlar burada oynadığı dueli xatırlayaraq həmin oyunda məğlub olduqlarını və yüksək temperaturun təsirli olduğunu deyib:

“Hava çox isti idi, yəqin ki, 40 dərəcədən də yüksək temperatur var idi. Qonaqpərvərliyiniz həmişə çox yaxşı olub, amma həmin vaxt bu, bizə kömək etmədi. Bizi dənizə apardılar, çox üzdük, ertəsi gün isə Bakıda uduzduq”.

Turskis həmçinin Azərbaycanda rastlaşdığı futbolçuları xatırladığını qeyd edib və İsgəndər Cavadovun israrlı hücumçu kimi yadda qaldığını vurğulayıb: “Maşallah, çox israrlı hücumçu idi, İsgəndər Cavadovu da xatırlayıram”.

Şəhərin dəyişməsi və qonaqpərvərlik

Litvalı veteran Bakının illər ərzində böyük dəyişikliklərə məruz qaldığını və qonaqpərvər münasibətin hələ də davam etdiyini qeyd edib: “Uzun illər əvvəl Bakıya gələndə hər şey tamam başqa cür idi. İndi burada hər şey çox gözəl və təmizdir”.