U-15 dünya çempionatı komandaları üçün üç mükafat təsis edildi

29 oktyabr 2026 — Bakıda keçirilən 15 yaşadək futbolçular arasında dünya çempionatı və FIFA festivalı çərçivəsində üç xüsusi komanda mükafatı təsis edilib. Mükafatlar turnirdə komandaların meydanda və meydandan kənarda nümayiş etdirdiyi xüsusiyyətlərə görə verilmək üçün nəzərdə tutulub.

FIFA-dan bildirilib ki, bu tədbirdə ənənəvi fərdi mükafatlar — məsələn, "Qızıl buts" və ya "Fair-play" — təqdim edilməyəcək. Bunun əvəzinə qaliblər komandaların özünəməxsusluğu, birliyi və müsbət əhval-ruhiyyəsi kimi kriteriyalar əsasında seçiləcək.

FIFA prezidenti Canni İnfantino bildirib: “FIFA-ya üzv assosiasiyaları təmsil edən 189 komandanın iştirak etdiyi bu tarixi tədbirdə inanılmaz enerjinin, rəqabət ruhunun, sevinc dolu anların və yeni dostluqların yaranmasının şahidi olduq. Bu, futbolu hər kəs üçün əlçatan etmək istiqamətində fəaliyyətimizi davam etdirmək həvəsimizi daha da artırır.”

Mükafatların qalibi turnirdə iştirak edən yeniyetmə futbolçuların səsverməsi ilə müəyyənləşəcək. Oyunçular meydanda, paltardəyişmə otaqlarında və İdmançılar kəndində bir araya gələrək turnir boyunca səs verəcəklər. Festivalın sonunda üç nominasiya üzrə mükafat təqdim olunacaq və bu nominasiyalarda medal verilməsi nəzərdə tutulmayıb.

Veriləcək mükafatlar belədir:

• Özünəməxsusluq mükafatı (Distinctive Identity Award) — oyun üslubu və kollektiv dəyərlərə görə;
• Futbol birləşdirir mükafatı (United by Football Award) — komanda içi birlik və dəstəyə görə;
• Pozitiv enerji mükafatı (Positive Energy Award) — ən böyük həvəs və müsbət əhval-ruhiyyəyə görə.

Mənbə: GettoSport