U-16 millimiz Hövsanda hazırlığa start verib

21 oktyabr 2026 — Azərbaycanın U-16 millisi FIFA U-15 Dünya Çempionatı və Festivalı üçün inşa edilən Hövsan Yarış Kompleksində ilk məşqini keçirib. Məşq turnir öncəsi hazırlığın başlanğıcı kimi təşkil olunub.

AFFA-nın mətbuat xidmətinin məlumatına görə, məşqdən əvvəl A millinin baş məşqçisi Ayxan Abbasov komandaya və məşqçi heyətinə uğurlar arzulayıb və gənc futbolçulara inamını ifadə edib.

“15 yaşınızda dünya çempionatında iştirak etmək hüququ qazandığınız üçün çox şanslısınız. Bu, karyeranız boyunca unudulmaz xatirə kimi qalacaq. Sizə inamımız yüksəkdir”.

Daha sonra Ayxan Abbasov yığmanın məşqini izləyib. Azərbaycan U-16 komandası turnirdə ilk oyununu oktyabrın 24-də saat 19:30-da "Crystal Hall"da Şərqi-Timorla keçirəcək.

Seçmə komanda qrup mərhələsində həmçinin Andorra, Avstraliya, İsrail və Haiti yığmaları ilə üz-üzə gələcək.

Mənbə: GettoSport