AMADA beynəlxalq vebinarda antidopinq təhsili və innovasiyalar barədə çıxış etdi

31 oktyabr 2026, Bakı — Azərbaycan Milli Antidopinq Agentliyinin (AMADA) nümayəndələri Milli Antidopinq Təşkilatları İnstitutu tərəfindən təşkil olunmuş "Fəaliyyətin keyfiyyəti və innovasiya" mövzusunda beynəlxalq vebinarda iştirak ediblər. Tədbir onlayn formatda keçirilib. Bu barədə Sportinfo.az məlumat yayıb.

AMADA-nın icraçı direktoru Təhminə Tağı-zadə "Antidopinqdə innovasiya: Təmiz idman nailiyyətləri üçün təhsil və süni intellektdən məsuliyyətli istifadə" mövzusunda təqdimatla çıxış edib. O, antidopinq təhsilində yalnız qadağalar və cəzalar əsasında qurulmuş yanaşmadan daha geniş, kompleks təhsil modellərinə keçidin vacibliyini vurğulayıb.

Təqdimatda CLEAN konsepsiyasının beş əsas istiqaməti — idmançının fərdi qiymətləndirilməsi, məşq yüklərinin rasional idarə olunması, orqanizmin enerji və resurslarla elmi əsaslandırılmış təminatı, bərpa və adaptasiya prosesləri, həmçinin psixoloji hazırlıq və antidopinq savadlılığının artırılması — təqdim olunub. Süni intellektin fərdiləşdirilmiş təhsil proqramlarının hazırlanmasında yaratdığı imkanlar, idmançının yaşı, idman növü və tədris dilinin nəzərə alınması perspektivləri müzakirə edilib.

Tağı-zadə eyni zamanda yeni texnologiyaların məsuliyyətli tətbiqi, şəxsi məlumatların məxfiliyinin qorunması, alqoritmlərin şəffaflığı və süni intellekt dəstəklənən qərarlar üzərində insan nəzarətinin saxlanmasının vacibliyini önə çəkib.

Vebinarın moderatoru AMADA-nın icraçı direktorunun müavini Rüfət Efendiyev olub. Tədbirdə ABŞ-ın USADA, Böyük Britaniyanın UKAD, Koreya Respublikasının KADA və Şərqi Timorun antidopinq təşkilatlarının, eləcə də İsveçrənin Berlinger şirkətinin nümayəndələri iştirak edərək elmi təminat, məlumatların təhlili, institusional inkişaf və texnoloji innovasiyalar sahəsində təcrübələrini bölüşüblər.

Mənbə: Sportinfo.az

Hazırladı: GettoSport