Zəngilan veloyürüşü məktəblilər üçün keçirildi

31 oktyabr 2026 — Zəngilan. Cəbrayıl, Zəngilan və Qubadlı rayonlarının Azərbaycan Prezidentinin xüsusi nümayəndəliyi ilə Azərbaycan Velosiped İdmanı Federasiyasının birgə təşkilatçılığı ilə Zəngilan rayonunda veloyürüş keçirilib. Tədbir 8 Noyabr — Zəfər Gününə həsr olunub. Bu barədə Sportinfo.az məlumat yayıb.

Yarışda Zəngilan şəhər məktəbinin və Ağalı ilə Məmmədbəyli kənd məktəblərinin şagirdləri iştirak edib. Həmçinin müxtəlif yaş qrupları üzrə Azərbaycan milli komandalarının üzvləri tədbirdə yer alıblar.

Tədbirin sonunda Azərbaycan Velosiped İdmanı Federasiyası tərəfindən veloyürüşdə iştirak edən Zəngilan məktəblilərinə velosipedlər və qoruyucu dəbilqələr hədiyyə edilib.

Organizatorlar veloyürüşün əsas məqsədini işğaldan azad olunmuş ərazilərdə idmanın və sağlam həyat tərzinin təbliği, məktəblilərin velosiped idmanına marağının artırılması, uşaqların asudə vaxtlarının səmərəli təşkili və onların idmana cəlb edilməsi kimi izah ediblər. Həmçinin belə tədbirlərin uşaqlar arasında dostluq və həmrəylik əlaqələrinin möhkəmlənməsinə və gənc nəslin Vətənə bağlılıq ruhunda yetişməsinə töhfə verdiyi vurğulanıb.

Mənbə: Sportinfo.az

Hazırladı: GettoSport