Elxan Məmmədov Bakıdakı U-15 mundialını yüksək qiymətləndirdi

FIFA-nın Avropa üzrə regional direktoru Elxan Məmmədov Bakıda təşkil olunan U-15 dünya çempionatı və festivalının gedişini və Azərbaycan yığmasının çıxışını yüksək qiymətləndirib.

Onun sözlərinə görə, yarışın Bakıda keçirilməsi təşəbbüsü iki il əvvəl FIFA prezidenti Canni İnfantino tərəfindən irəli sürülüb və İcraiyyə Komitəsinin təsdiqindən sonra AFFA tərəfindən Hövsanda qısa müddətdə lazımi infrastruktur yaradılıb. Mundialda 211 ölkədən 189-nun və ümumilikdə 3000-ə yaxın idmançının iştirak etməsi FIFA tarixində bir ilkdir.

Elxan Məmmədov turnirin təşkilində heç bir mənfi məqama rast gəlinmədiyini vurğulayıb: “Azərbaycanın U-15 yığması çox yaxşı oyun nümayiş etdirir. Bu yığma Azərbaycan futbolunun gələcəyidir”. O əlavə edib ki, dünya şöhrətli mütəxəssis Arsen Venger də Bakıdakı yarışı yaxından izləyir və yerli mütəxəssislərə ustad dərsləri keçib.

Həmçinin bildirilib ki, 2027-ci ildə Azərbaycan və Özbəkistanda keçiriləcək FIFA U-20 dünya çempionatı ilə bağlı hazırlıq işlərinə də artıq start verilib.

Mənbə: GettoSport